АҚШ президенти Барак Обама Нью-Йоркда ташкил қилинган БМТ бош ассамблеясида Сурия масаласи ҳақида нутқ сўзлади. Россия давлати АҚШ учун керакли эканлигини билдирган Обама Москванинг дунё давлатлари орасида ўз мавқейига эга бўлиши лозимлигини таъкидлаб ўтди. Обамага кўра, Украина инқирози туфайли АҚШнинг Россияга нисбатан жорий қилган санкциялари икки давлат ўртасида совуқ уруш қайта бошланганлигини англатмайди.
“Россияни ҳар томонлама қамал қилишни истамаймиз. Бизга кучли бир Россия лозимдир”, “Ҳар қанча кучли армияга ва ҳар қандай кучли иқтисодга эга бўлсак ҳам, Америка қўшма штатлари дунёнинг муаммоларини бир ўзи ёлғиз ҳал қилишга қодир эмас. Биз буни яхши биламиз. Юз минглаган АҚШ аскарларининг Ироққа сафарбар қилиниши ва бюджетдан триллионлаган долларларнинг ажратилиши бегона диёрда барқарорликни вужудга келтира олмаслигини кўрдик. Бу биз учун яхши дарс бўлди”, деди АҚШ президенти.
Сурия масаласини ҳал қилиш учун барча давлатлар, жумладан Россия ва Эрон билан ҳам ҳамкорликда фаолият олиб боришга тайёрлигини билдирган Обама АҚШ ва иттифоқдошларини ҳимоя қилиш учун ҳеч иккиланмаслигини қайд этди. Бироқ Обама АҚШ ва иттифоқдошларини қандай хатардан ҳимоя қилиш керак бўлиб қолганлиги ҳақида гапирмади.