Эрон революцион гвардиячилар армиясининг қўмондонларидан бири шия руҳонийси Маҳди Тоиб ўзининг баёнотида, Эрон ҳужумга ўтса 10 сонияда Исроилни йўқ қила олиши мумкинлигини олға сурди.
Маҳди Тоибнинг билдиришича, Исроил Эронга атом бомба отадиган бўлса, 7 дақиқада Эрон ҳудудларига етиб келади. Аммо Эрон давлати Ливан жануби, Ғазо ва Ғарбий қирғоқ тарафидан 10 сония ичида Исроилнинг атом иншоотларига зарба бериши мумкин. Натижада ядровий портлашни юзага келтириш орқали Тел-Авивни йўқ қилиш 10 сонияда амалга ошади.
Узоқ йиллардан буён Исроил ва АҚШга қарши важоҳатли чиқишлари билан танилган Эрон Ғарб манфаати учун Сурияда ва Ироқда мазҳабларо низо чиқаришда фаол иштирок этиб келаётгани ҳеч кимга сир эмас. АҚШ ва Ғарб билан битим имзолагандан кейин ҳам унинг Исроилга пўписа қилиши минтақа аҳолисининг яна ишончини қозонишга ҳаракат қилаётганидан даракдир. Ҳужжат ул-Ислом саналган Маҳди Тоибнинг “Эрон 10 сонияда Исроилни йўқ қилиш қудратига эга”, деган даъвоси “Унда нима учун Эрон шу вақтгача Исроилни йўқ қилмади”, деган саволни юзага келтириши табиий.
Исроил ва АҚШга қарши гапиришга одатланган Эрон бундан аввал махфий учрашувлар орқали Исроил билан Қурол яроқ олди-сотди қилганлиги ошкор бўлиб қолган эди. Энди эса АҚШ, Исроил ва бошқа ғарб давлатлари билан алоқаларини ошкоро тиклаган Эрон ҳукумати Яман, Сурия, Ироқ ва Афғонистон каби давлатларда катта нотинчликлар юзага келтириш ролини ўйнамоқда.
Бошқа бир тарафдан Исроил матбуотида Эроннинг ҳеч қачон Исроил давлати учун таҳдид бўлмаганлиги ҳақида мақолалар чоп этила бошлади. Исроилнинг машҳур газеталаридан бири “Гаарец”нинг ёзишича, Эрон Исроилнинг ҳақиқий душмани бўлмаган. Газетага кўра, 10 мингдан 25 мингтагача бўлган яҳудийлар Эронда тинч, осуда ҳаёт кечириб келишади.
“Эроннинг ортиб борётган кучи ва ядровий битимлар ҳақида қонуний саволлар бериш учун яхшигина сабаблар мавжуд бўлиши мумкин. Аммо Эрон ирқчи (натцист) Германия эмас”, дея ёзади “Гаарец” газетасининг ёзувчиси Петер Бейнарт.