АҚШ мудофаа вазири Эштон Картер Яқин Шарққа уюштирган сафарида Эрон ядро дастурига оид битим имзоланишидан хавотирга тушган Исроилни тинчлантиришга уринди. Исроил хавфсизлиги ҳар бир нарсадан муқаддам туришига урғу берган Картер Эрон билан тузилган ядро келишуви яҳудлар хавфсизлигига таъсир қилмаслигини алоҳида таъкидлаб ўтди.
Эштон Картер Яқин Шарққа уюштирган сафарида Исроил мудофаа вазири Моше Ялон билан учрашди. Тел-Авивдаги мудофаа вазирлиги биносида ўтказилган учрашув ортидан журналистлар учун муштарак матбуот анжумани ташкил қилинди. Анжуманда Эрон ядро дастурига оид битим ва АҚШ-Исроил ўртасидаги алоқалар муҳокама қилинди.
АҚШ мудофаа вазири Эрон билан тузилган битим Пентагон учун ҳеч нарсани ўзгартирмаслигини таъкидлар экан, “Исроил мудофааси борасидаги мажбуриятларимиз қоя каби мустаҳкамдир. Орамиздаги иттифоқ ҳам ҳар доимгидан кўра кувватлироқдир”, “АҚШ ва унинг армияси ҳамда шахсан мен учун Исроил хавфсизлиги биринчи ўринда туради. Исроилнинг АҚШдан яхшироқ дўсти йўқ”, дея қайд этди.
Исроил мудофаа вазири Моше Ялон Исроил хафвсизлигини ўз бўйнига олганлиги учун Америка идорасига миннатдорчилик билдирди.
“Шу вақтгача сиз Исроилнинг ҳақиқий дўсти эканлигингизни исботладингиз. Доимо Исроил хавфсизлигини биринчи ўринга қўйдингиз. Исроил хавфсизлигига қўшган ҳиссангиз қанчалар буюк эканлигини кўпчилик билади. Исроилнинг АҚШдан буюкроқ дўсти йўқ. Биз бу ерда баёнот бериб турган бир пайтда Исроил ва Америка буюк ишлар устида ҳамкорликда фаолият олиб бормоқда”, деди Ялон.
Эштон Картер Исроил бош вазири Бинямин Нетаняҳу билан учрашгандан сўнг Саудия Арабистони ва Иорданияга сафарини давом эттиради.
