Кеча Туркиянинг Шонлиурфа вилоятига қарашли Суруч шаҳрида юз берган портлашдан сўнг Туркия президенти Ражаб Тоййиб Эрдоган террорга қарши курашни амалда бошлашга чақирди.
“Шонлиурфа вилоятининг Суруч шаҳрида террорни бошдан кечирдик. Бу террорда 28 фуқаромиз ҳалок бўлди. Юзга яқин киши жароҳат олди. Бу ишни қилганларни ўз шахсим ва халқим номидан лаънатлайман. Террорга қарши халқаро ҳамкорлик ичида бўлгандан кейин унга қарши курашни бошлаш лозимдир. Биз буни бир неча йиллардан буён айтиб келамиз. Аммо фақат айтибгина қолавермай амалга ўтиш вақти келганини алоҳида таъкидлаб ўтмоқчиман”, деди президент Эрдоган.
Туркиянинг Сурия чегараси яқинида жойлашган Шонлиурфа вилоятига қарашли Суруч шаҳрида юз берган кучли портлаш натижасида ҳалок бўлганлар сони 32 нафарга етганлиги айтилмоқда. Воқеа жойида оғир жароҳат олганлар шифохонада жон таслим қилаётганлиги туфайли ўлганлар сони янада ортиши мумкин.
Гувоҳларнинг билдиришича, Суруч шаҳрининг Амара маданият марказида ёшлар жамияти федерациясининг уч юзга яқин аъзоси йиғилиб Кобанини қайта барпо қилиш учун матбуот баёноти ўқиб эшиттирилаётган пайтда кучли портлаш содир этилган. Портлашга сабаб бўлган жонли бомбанинг 18-19 ёшли аёл эканлиги тахмин қилинмоқда.