Оқўрда матбуот хизматининг хабар қилишича, Хитой халқ республикаси раиси Си Цзиньпин 7 май куни расмий ташриф билан Қозоғистонга келади.
“7 майда расмий ташриф билан Қозоғистонга келиши режалаштирилган Хитой халқ республикаси раиси Си Цзиньпин билан музокаралар ўтказилиши кутилмоқда”, – дейилади хабарда.
Ўз навбатида, Хитой ташқи ишлар вазири ўринбосари Чэн Гопин Хитой раҳбарининг Қозоғистонга уюштирадиган сафари ҳақида берган баёнотида, бу ташриф “сиёсий қўллаб-қувватлаш белгиси” эканлигини айтиб ўтди.
“Раиснинг ташрифи Нурсултон Назарбоев президентликка қайта сайлангандан сўнг хорижий давлат раҳбарининг Қозоғистонга биринчи ташрифи бўлади, бу эса Хитой президент Назарбоевни сиёсий қўллаб-қувватлаётгани белгиси ҳисобланади. Шунингдек, ушбу ташриф икки мамлакат ўртасидаги стратегик шериклик юқори даражада эканлигига далолатдир”, – деди Чэн Гопин.
