Ҳарбий тўнтариш орқали Миср ҳокимиятини қўлга олган Абдулфаттоҳ ас-Сиси икки кунлик расмий сафар билан Испанияга йўл олди. Миср президентини Испания Қироли Филипп VI ва унинг хотини Летизия Қирол саройида қабул қилди.
Президент ас-Сиси Испанияда Исломий кучларга қарши курашган бош қаҳрамон сифатида кутиб олинди. Расмий учрашув чоғида Испания қироли Филипп VI ас-Сисининг сиёсий Исломчиларга қарши кураш олиб бораётган эътиборли давлат раҳбари эканига урғу бериб ўтди ва бошқаларни ҳам бу борада ас-Сисига ёрдам беришга тарғиб қилди.
“Ўрта Шарқда бош кўтарган ва минтақада беқарор вазиятни вужудга келтирган фундаменталистларга қарши Ас-Сиси бошчилигида олиб борилаётган курашда Миср ҳукуматига ёрдам бериш лозим”, деди қирол Филипп VI.
Президент ас-Сисининг Ливия, Сурия, Яман, ва Фаластинда давом этаётган урушларга чек қўйиш учун мукаммал восита бўлишини ҳам тилга олиб ўтган қирол Испания бу даврда сиёсий жиҳатдан ҳам, иқтисодий жиҳатдан ҳам Мисрнинг ёнидан ўрин олишини маълум қилди.
Испанияда чиқадиган газеталарнинг ёзишича, ас-Сиси раҳнамолигида Испания ва Миср ўртасида олиб борилаётган иқтисодий алоқалар анчагина кучайган. Шунингдек, Испан фирмалари бу муҳим аҳамиятга эга Ўрта Шарқ ўлкасида миллиардлаган еврога тенг тендерларни қўлга кирита бошлаган.
Испания қироли ва унинг хотини тарафидан қирол саройида Сисининг шарафига берилган зиёфатга Испания бош вазири Мариано Рахой бошчилигида жуда кўп ҳукумат вакиллари ҳозир бўлишди.
