Россия Бош ҳарбий штабидаги манба маълумотига таянган ҳолда “Коммерсант” нашрининг хабар қилишича, Россия яқин йиллар ичида Тожикистонга 70 миллиард рубл (1 миллиард 230 миллион долларга яқин) ҳажмидаги ҳарбий-техник кўмак кўрсатади. Тожикистон қуролли кучларини модернизация қилиш бўйича келишувга 2014 йил ёзидида эришилган бўлсада кўрсатиладиган ёрдам ҳажми энди очиқланди.
Нашрнинг маълум қилишича, Тожикистон кўмак доирасида Коллектив хавфсизлик тўғрисидаги битим ташкилоти линияси бўйича алоқа воситалари, ўқотар қуроллар ва ўқ-дорилардан тортиб, авиация, артиллерия ва зенит-ракета қурилмаларигача бўлган кенг турдаги қурол-яроғларга эга бўлади. Қуроллар асосан Россия Мудофаа вазирлиги қисмларидан келиб тушади.
Россия ҳукумати Тожикистонга фақатгина қурол-яроқ етказиб бериш билан чекланмасдан, бу мамлакат ҳудудида жойлашган 201 ҳарбий базасидаги ҳарбийлар сонини оширишга ҳам қарор қилди. Ҳарбий база қўмондони Евгений Туболнинг сўзларига кўра, кейинги беш йил ичида ҳарбий хизматчилар сони 1,5 фоизга ошириб, 9 минг кишига етказилади.
“2020 йилгача ҳарбий база шахсий таркибини 9 мингта етказиш ражаси бор”, – деди Тубол.
Унинг сўзларига кўра, айни вақтда ҳарбий базада 5,9 минг киши хизмат қилмоқда ва мингдан зиёд ҳарбий техникалар бор.
Марказий Осиёда ўзининг ҳарбий иштирокини кучайтириш учун жиддий ҳаракат қилаётган рус ҳукумати нафақат Тожикистон, балки Қирғизистонни ҳам қурол-яроқ билан таъминлаб келмоқда.
“Қирғизистон раҳбарияти тақдим қилган дастурга мувофиқ (ҳарбий техникалар етказиб бериш) давом этмоқда. Шундай давом этади”, – деди КХШТ Бош котиби Николай Бордюжа “K-News” сайтига жума куни берган хабарида.
Шу билан бир қаторда Бош котиб Қирғизистонга етказиб берилаётган қурол-яроқлар тури ва миқдорини ошкор этишни истамади.
Маълумки, 2012 йилда Қирғизистонга Россия томонидан 1 миллиард долларлик қурол-яроқ етказиб бериш бўйича шартнома имзоланган, қурол ва ҳарбий техникалар етказиб бериш 2013 йилнинг декабр ойидан бошланган эди.