Саудия арабистони қироли Салмон бин Абдулазиз Яманда юз берган охирги ҳодисалар юзасидан Кўрфаз давлатларининг юқори даражали масъуллари билан учрашув ўтказди.
Саудия Арабистонининг “SPA” расмий ахборот агентлиги тарқатган хабарга кўра, Баҳрайн валиаҳд шахзодаси ва бош вазир ёрдамчиси Салмон бин Ҳамид ал-Халифа, Абу-Даби валиаҳд шахзодаси шайх Муҳаммад бин Зойид ал-Наҳян, Қатар бош вазири ва ички ишлар вазири шайх Абдуллоҳ бин Носир ас-Сони, Қувайт бош вазирининг ёрдамчиси ва ички ишар вазири шайх Муҳаммад ал-Холид ас-Сабани минтақада кечган ҳодисалар, хусусан Яманда юз берган охирги ўзгаришларни муҳокама қилиш учун Саудияга ташриф буюрган. Қирол Салмон меҳмонларни пойтахт Риёздаги саройида қабул қилди.
Кўрфаз давлатларининг вакиллари Яманда юз берган ҳодисалар ҳақида ўз хавотирларини билдирди. Вакилларга кўра, Яман ваҳимали натижаларни келтириб чиқарадиган шаклда қоронғу бир туннелга қараб кетмоқда. Улар бундай вазиятда минтақанинг хавфсизлиги ва барқарорлигига путур етишидан огоҳлантиришди.
Яманда қонуний президент бўлган Абдурробби Мансур Ҳодийни дастаклаш борасида ҳамфикр эканликларини баён қилган вакиллар қардош Яман халқи учун хавфсизлик ва барқарорликни таъминлаш мақсадида бор кучлари билан ҳаракат қилишга тайёр эканликларини қайд этишди.
Учрашув чоғида Кўрфаз давлатларининг хавфсизлиги Яманнинг хавфсизлигига чамбарчас боғлиқ эканлиги урғуланди. Хусусан президент Ҳодийнинг мамлакат хавфсизлиги ва барқарорлигини муҳофаза қилишни истаган барча тарафларнинг иштироки ила Кўрфаз давлатлари ҳамкорлиги назорати остида Риёзда йиғилиш ташкил қилиш ҳақидаги талабининг дарҳол қабул қилиниши юқори баҳоланди.
Бирлашган араб амирликлари, Қатар, Қувайт ва Баҳрайндан ташриф буюрган юқори даражали масъуллардан тузилган ҳайъатнинг зиёрати қачонгача давом этиши ҳақида хабар мавжуд эмас.