“CA-NEWS” нашрининг хабар қилишича, Қозоғистон Халқ Ассамблеяси мамлакатда муддатидан аввал президентлик сайловини ўтказиш ташаббусини илгари сурган. Шанба куни Остонада Қозоғистон Халқ Ассамблеяси (ҚХА)кенгашининг навбатдаги йиғилиши бўлиб ўтиб, унда делегатлар бир овоздан мамлакатда муддатидан аввал президентлик сайлови ўтказиш ташаббусини қўллаб-қувватлаган.
“Бунга сабаб – 2016 йилда жаҳон моливий инқирозининг энг кучайган вақти бўлиши кутилмоқда ва дунёдаги мураккаб геосиёсий вазиятни ҳисобга олган ҳолда, ушбу ташаббус ўз вақтида илгари сурилди”, – дейди сенатор Куаныш Султанов.
ҚХАаъзоларининг мамлакат аҳолисига қилган мурожаатида “мураккаб глобал вазиятни ҳисобга олган ҳолда мамлакат президенти Нурсултон Назарбоевга янги умуммиллий ишонч билдириш лозим”лиги таъкидланмоқда.
“Дунёда янги ва мураккаб беқарорлик кечаётган бир вақтда Назарбоевга ишонч билдириш лозим бўлиб, бунда мамлакат ўзининг стратегик йўлидан адашмаслиги ва давлатнинг кенг кўламли модернизация йўли давом этиши ҳамда дунёдаги 30 та энг кучли давлатлардан бирига айланишини таъминлаш муҳимдир”, – дейилади ҳужжатда.
Бундан ташқари ҚХА аъзолари 2016 йилда президент сайлови ва парламент сайловини ўтказиш бир муддатга тўғри келиб қолаётганини ҳисобга олган ҳолда, уларни бир-бирига халақит қилмаслигини ва Конституция нормалари ижросини таъминлаган ҳолда сайловларни турли вақтларда ўтказишни мақсадга мувофиқ деб ҳисобламоқдалар.
Маълумки, Қозоғистонда ўтган сафарги президентлик сайлови ҳам муддатидан аввал 2011 йилнинг 3 апрелида ўтказилган эди. Унда амалдаги президент номзоди билан бирга Қозоғистон Коммунистик халқ партияси марказий қўмитаси котиби Жамбил Ахметбеков, Қозоғистон Ватанпарварлар партияси раиси парламент сенати депутати Гани Касимов ва «Табигат» экологик ташкилоти етакчиси Мэлс Елеусизовлар номзодлари кўрсатилган эди. Сайлов натижасига кўра, Нурсултон Назарбаев 95,55 %,, Гани Касимов — 1,94 %, Жамбил Ахметбеков — 1,36 %, Мэлс Елеусизов — 1,15 % овозга эга бўлган.
Туркистон:
Назарбоевнинг призидент сайловини илгари суриши, асосан бир нарсадан дарак беради. ЕВРОЗЕС ташкилотига аъзо давлатларини оғир кунлар кутади.
Халқнинг яшаш даражаси тубанлашади. Бу Россиянинг инқирозида, унинг қисматига шерик бўлишга мажбур бўлган ташкилот аъзоларини кутаётган деярли қайтмас жароён бўлиб келмоқда. Фуқороларнинг яшаш даражасини пасайиши, бир қатор норозиликлар келтириб чиқариши аниқ. Назарбоев бу норози кучларга қарши аёвсиз чоралар кўриши муқаррар. Бу эса, сайлов олдида уни, халқ олдида обруйсизланишига олиб боради. Шунинг учун Назарбоев у кун келганида, халқидан салтанат сўрайдиган холатда бўлишни хохламайди. У халқини керак бўлса қириб юбориши мумкин бўлган имкониятда бўлишни хохлайди. Кейинги сайловгача, темир тартибни янада мустахкамлаб улгуриши керак. Шунинг учун у сайловни тезлатишга уринаяпти. У ўзининг авторитар режимини янада кучайтирмоқчи.
