Бир неча ҳафтадан буён шифохонада даволанаётган Саудия Арабистони подшоҳи қирол Абдуллоҳ қарийб 90 ёшда оламдан ўтди. Қирол зотилжам касаллигидан азият чекаётган эди. 2005 йилда акаси Фатҳнинг ўрнига тахтни эгаллаган қирол Абдуллоҳ “террор”га қарши курашда ҳамда нефт таъминоти масалаларида АҚШнинг стратегик ҳамкори ҳисобланади. АҚШ президенти Барак Обама қиролнинг ўлими муносабати билан Саудия Арабистони халқига ва қирол оиласига ҳамдардлик билдирди. Обама уни хавфсизлик ва барқарорлик йўлида икки томонлама муносабатлардан моҳирона фойдалана олган раҳбар дея таърифлади. АҚШ давлат котиби Жон Керри ҳам Америка яқин дўстидан айрилганлигини маълум қилди.
“АҚШ яқин дўстидан айрилди. Яқин Шарқ ва бутун дунё эса юқори мартабали етакчидан айрилди. Абдуллоҳ экстремизмга қарши курашда ҳам, тинчлик ташаббусларини олға суришда ҳам бизнинг яқин ҳамкоримиз эди”, деди АҚШ давлат котиби Жон Керри.
Қирол Абдуллоҳ касалхонада тўшакда михланиб вафот этар экан, унинг мамлакат бойликларидан йиғиб олган 180 000 000 000 долларлик шахсий бойлиги банкларда қолиб кетди. Қирол ўзининг чиқишларида агар Фаластинга ўз давлатини барпо этишига йўл қўйиб берилса, Араб давлатлари лигасига аъзо давлатлар Исроилни тан олади” деб чиққан эди.
Дунё нефт захираларининг 16 фоизига эга бўлган Саудия Арабистони Катта Йигирмаликка, шунингдек, Халқаро савдо ташкилотига аъзо. ИШИДга қарши кураш баҳонасида Суриядаги мусулмонларни бамбордимон қилишда АҚШ тузган коалициянинг фаол иштирокчиси ҳисобланади.
Қирол Абдуллоҳнинг вафотидан сўнг унинг тахтини 48 йил давомида Риёд вилоятини бошқарган 79 ёшли ўгай укаси Салмон ибн Абдулазиз Сауд эгаллади. Салмон ибн Абдулазиз мудофаа вазири бўлган пайтда Саудия арабистони “Исломий давлат” ташкилотига қарши Америка бошчилигидаги ҳарбий иттифоққа қўшилди.
Мутахассисларнинг фикрича, Саудиянинг янги қироли Салмон бин Абдулазиз акаси Абдуллоҳ юритган сиёсатни давом эттиради. Унинг ўзи ҳам телевидения орқали халққа мурожаат қилиб собиқ қирол Абдуллоҳнинг ишларини давом эттиришини билдирди.
