Қирғизистон президенти Алмазбек Атамбаев 23 декабр куни Москва шаҳрида бўлиб ўтадиган КХШТ Коллектив хавфсизлик кенгашининг навбатдаги йиғилишида иштирок этиш учун 22 декабр куни иш сафари билан Москвага жўнаб кетди.
Шу билан бирга, мазкур сафари доирасида Алмазбек Атамбаев Евроосиё иқтисодий иттифоқи (ЕОИИ) Олий кенгашининг навбатдаги йиғилишида ҳам иштирок этади. Мазкур йиғилишда Атамбаев 2015 йилнинг 1 январидан бошлаб Қирғизистонни ЕОИИга кириши тўғрисидаги ҳужжатни имзолаши керак бўлади.
Бироқ, Қирғизистон ҳукумати бу иттифоққа аъзо бўлиши керакми ёки йўқлигини ҳозирга қадар аниқ белгилаб олмаган кўринади. 20 декабр куни бўлиб ўтган Қирғизистон вазирлар махкамаси мамлакатни Евроосий иқтисодий иттифоқига қўшилиши тўғрисидаги шартнома лойиҳасини кўриб чиқишни кейинга қолдиргани ҳақида хабар қилинган, аммо бош вазир Жўмарт Ўтарбоев бу борада музокаралар давом этаётганини маълум қилган бўлсада, ҳужжатни тайёр эмаслиги сабабларига аниқлик киритмаган эди.
22 декабр душанба куни вазирлар махкамаси ёниқ эшиклар ортида Қирғизистонни ЕОИИга кириши тўғрисидаги ҳужжатни тасдиқлагани ва кўриб чиқиш учун парламентга топширгани бироқ, парлемент келишув лойиҳасини кўриб чиқишни рад этгани хабар қилинди.
Кейинчалик, президент Москвага учиб кетишидан бир неча соат олдин, праламентнинг навбатдан ташқари йиғилишида – бу ҳам матбуот вакиллар иштирокисиз – келишув лойиҳасини тасдиқлагани маълум бўлди.
Депутатларнинг сўзларига кўра, вазирлар махкамаси барча керакли ҳужжатларни тақдим қилган ва ҳужжатнинг ахамиятини тушинтириб берган.
Шундай қилиб, Қирғизистон халқи тақдирини хал қилиши керак бўлган ҳужжат лойиҳаси ярим кун ичида, вазирлар махкамаси ва парламент томонидан тасдиқланиб, президент билан бирга Москва шаҳрига жўнатиб юборилди. Эртага, 23 декабр куни тўрт давлат президентлари бу ҳужжат остига ўз имзоларини қўйишади.
Айни пайтда, Қирғизистонни ЕОИИга аъзо бўлиши бўйича келишув матнини вазирлар махкамаси, Жўгорку Кенеш депутатлари ва президентдан бошқа ҳеч ким кўрмади.
