Эрон ташқи ишлар вазири Жавод Зариф Саудия Арабистони ташқи ишлари вазири Сауд Файсал билан Нью-Йорк шаҳрида учрашди. Икки ҳамкасбнинг БМТ бош ассамблеясидаги учрашуви икки давлат орасидаги алоқалар кучаётганига ишора сифатида талқин қилинмоқда.
Саудия ташқи ишлар вазири Файсал бу учрашувни “икки мамлакат орасидаги алоқаларнинг ривожи учун янги саҳифанинг очилиши”, дея қайд этди. Эрон ташқи ишлар вазири Жавод Зариф эса Теҳрон-Риёз алоқаларининг келажаги борасида катта умиди борлигини билдирди. Зарифга кўра, бу учрашув минтақа давлатлари ва Исломий ўлкалар орасидаги муносабатларни ҳисобга олганда, ўта муҳим аҳамиятга эгадир.
Сауд Файсал учрашув чоғида икки давлат, яъни Эрон ва Саудия минтақада катта таъсирга эга давлат эканлигини ва бу икки давлат алоқаларининг мустаҳкамланиши минтақа тинчлиги ва хавфсизлигини кучайтирувчи омил эканлигини таъкидлаб ўтди. Файсал хусусан, Ўрта Шарқ эътибордан четда қолдириб бўлмайдиган нуқтага айланганлигини ва ўтмишда қилинган хатолар такрорланмаса, минтақадаги муаммонинг ечилишида муваффақиятга эришиш мумкинлигини билдирди.
Эрон президенти Ҳасан Руҳоний ҳам ўзининг ўтган баёнотида минтақадаги мусулмон давлатлари, жумладан Саудия давлати билан алоқаларини кучайтириш минтақа хавфсизлигини сақлаш учун ўта муҳим аҳамиятга эга эканлигини билдирган эди.
