Эрдуғон Керри билан ҳам учрашди

АҚШ мудофаа вазири Чак Хейгелнинг зиёратидан тўрт кун ўтиб АҚШ давлат котиби Жон Керри Туркия пойтахти Анқарага келди. Туркия президенти Ражаб Тоййиб Эрдуғон Керрини ҳам Чанкая саройида қабул қилди. Икки ярим соат давом этган учрашувда Туркия ташқи ишлар вазири Мавлут Жавушўғли, ташқи ишлар вазирининг маслаҳатчиси Феридин Синирўғли, Туркиянинг АҚШдаги элчиси Сардор Қилич ва Президент бош котибининг ёрдамчиси Иброҳим Қалин иштирок этди.

Президент Эрдугон АҚШ давлат котибини “Welcome” (хуш келибсиз), дея кутиб олди. Керри ҳам ўз навбатида “Сизни кўриш нақадар гўзал”, дея жавоб қайтарди. АҚШнинг Туркиядаги собиқ элчиси, ҳозирда маслаҳатчи вазифаси юклатилган Росс Уилсон ҳам Эрдугонга турк тилида “Ҳурматли президент, аҳволингиз яхшими?”, дея мурожаат қилди. Эрдугон ҳам АҚШдан келган ҳайъатга “Бу ерда сизларнинг кўнглингизни олишдан ғоятда мамнун эканлигимни алоҳида таъкидлаб ўтишни хоҳлайман”, дея илтифот билдирди.

Учрашувда Туркия ташқи ишлар вазири Жавушўғлининг олдидаги қизил ҳужжатлар тўплами эътиборни тортди. Бундан сўнгра Жон Керри бош вазирлик биносида Туркия бош вазири Аҳмад Довутўғли билан ҳам учрашди ва учрашув 15 дақиқа давом этди.

Президентлик манбаларидан олинган маълумотларга кўра, учрашув чоғида минтақадаги барча “террорчи” (жиҳодий) гуруҳларга қарши – бугунга қадар давом этиб келгани каби – бугундан кейин ҳам Америка билан Туркия ҳамкорликда кураш олиб боришга келишиб олган. Туркия ва АҚШ бу майдонда разведка алмашиш, Сурия миллий мухолифатига логикалик (яъни автоулов ва ёқилғи) жиҳатдан дастаклаш ва инсоний ёрдамларни давом эттириш мавзуси яна бир бор муҳокама этилганлиги билдирилди.