“НАТО Тезкор кучлари” ташкил қилинди

НАТО иттифоқининг Уэлсда бўлиб ўтган икки кунлик саммитида “НАТО Тезкор кучлари”ни ташкил қилиш борасида келишиб олинди. Бу “тезкор кучлар” НАТО иттифоқига аъзо давлатларга нисбатан таҳдид туғиладиган бўлса 48 соат ичида у ерга етиб бориши, шунингдек Украинадаги инқироз каби ҳолат юз берган ҳолда уни тўхтатувчи рол ўйнай олиши айтилмоқда.

Хабарларда айтилишича, “НАТО Тезкор кучлари” Россиянинг Украина борасида юритган сиёсати сабабли ташкил қилинган бўлса ҳам, аммо ҳозирги вазиятда қайси тарафдан келмасин, ҳар қандай таҳдидга қарши тура оладиган даражада бўлади. Бу тезкор кучларни ташкил қилишдан яна бир мақсад таҳдидга юзма-юз келиб турган НАТОга аъзо давлатларни хотиржам қилишдир.

“НАТО Тезкор кучлари”нинг энг юксак даражадаги хос кучлари турли ўлкаларда жойлаштирилади. Улар икки кун ичида тегишли ўлкага юбориладиган даражада халқаро амалиётлар учун тайёр туришади.

“Тезкор кучлар” қуруқлик қўшинларидан ташкил топган. Минглаган аскарларни ўз ичига олган бу кучларга – зарур бўлганда – денгиз ва ҳаво кучлари тарафидан дастак берилиши режалаштирилган. Ундаги ҳарбийларнинг сони аниқ белгиланмаган бўлса ҳам, бироқ инқирознинг ёки таҳдиднинг катталигига қараб ўзгариши мумкин.