Орадан икки йил ўтган бўлсада Дача-Сууда одамлар умрига зомин бўлган машъум юкнинг эгаси топилмади
Бундан икки йил муқаддам, 2017-йил 16-январ куни тонги соат 7:30лар чамаси “Манас” халқаро аэропорти яқинида жойлашган Дача-Суу қишлоғига Туркия компаниясига қарашли “Боинг-747” самолёти қулаб тушган, бахтсиз ходиса натижасида қишлоқда яшовчи 35 киши ва экипажнинг тўрт аъзоси қурбон бўлган эди. Ўша вақтда тарқалган хабарларда айтилишича, “Боинг-747” русумли юк ташувчи самолёт Гонконг-Бишкек-Истамбул йўналиши бўйича учаётган бўлган.
Расмий маълумотларга кўра, ходиса оқибатида қишлоқдаги 19 уй тўлиғича вайрон бўлиб, 7та уй яроқсиз ҳолга келган, 12 уй қисман зарар кўрган. Бундан ташқари, одамларнинг мол-ҳоли ва автомашиналари ҳам вайрон бўлган эди.
Содир бўлган авиаҳалокат Қирғизистон халқининг умумий фожиасига айланди, одамлар тезлик билан зарар кўрган қишлоқ аҳлига моддий ва маънавий ёрдам кўрсатишга киришиб кетишди. Қисқа вақт ичида халқдан 102 миллион 160 минг 180 сом маблағ йиғилди. Бироқ, расмий ҳукумат йиғилган маблағ тенг тарқатилгани, еттита фуқаро уй олганини айтган бўлса-да, хавфсизлик жиҳатидан ким қанча пул олгани очиқ кўрсатилмаслигини таъкидлаган.
Ўша вақтда расмий ҳукумат “Манас” аэропорти яқинида қулаган “Боинг” самолётида Қирғизистон фуқароларининг юки йўқ бўлганини билдирган бўлса ҳам, бироқ халқ ичида самолётдаги юк Қирғизистонда таниқли бўлган одамлар, хусусан, собиқ президент Алмазбек Атамбаевга тегишли бўлгани ҳақида гап-сўзлар юриб келади.
Шу вақтга қадар 39 кишининг умри зомин бўлган машъум юкнинг эгаси топилмагани ҳам бу иш ортида ўта бой ва қудратли шахслар турганига далолат қилади. Ҳукумат халқдан тўпланган пулни фожиа натижасида зарар кўрган оилаларга тарқатиб, қурбон бўлганлар хотирасига эсдалик ўрнатиб қўйиш билан гўёки ўз вазифасини бажарган бўлди.
Абдураҳмон
