Бишкекда Хитойга қарши митинг бўлиб ўтди
“Қирқ жўралар” жамоат бирлашмаси аъзолари Қирғизистон ҳукуматидан республикада ноқонуний равишда бўлиб турган хорижликларни 30 кун ичида мамлакатдан чиқариб юборишни талаб қилди. Бу ҳақда улар Хитой элчихонаси биноси яқинида бўлиб ўтган пикет вақтида баёнот беришди.
“Азаттык”нинг хабар беришича, акцияда 200га яқин киши иштирок этди. Акция ташкилотчиларининг таъкидлашларича, давлат идоралари норасмий муҳожирлар сонини аниқлаш ва мамлакатдан чиқариб юбориш мақсадида жамоатчилик қўшма комиссиясини тузиши керак. Ташкилот аъзолари баёнот бериб, агар шу каби комиссия тузилмайдиган бўлса, у ҳолда бу иш билан ўзлари шуғулланишларини айтишди.
Куни кеча пикет ташкилотчилари баёнот бериб, Хитой расмийларидан этник камчиликни ташкил этувчи фуқорларни таъқиб қилишни тўхтатишни ва ҳар фуқаронинг нима сабабдан ушлангани юзасидан тушунтириш беришни талаб қилишларини айтишган эди.
Сўнгги ойларда Шинжонда этник камчилик таъқиб қилинаётгани ва махсус муассасаларда мажбуран ушлаб турилгани борасидаги хабарлар боис Хитой жаҳон ҳамжамиятининг диққат марказида турибди. Бу муассасаларни Пекин “маърифий марказлар” дея, ҳуқуқ ҳимоячилари эса “сиёсий қайта тарбиялаш лагерлари” дея атайди. Турли маълумотларга қараганда, бу муассасаларда бир миллионга яқин киши ушлаб турилибди.
Хитойдаги “қайта тарбиялаш лагерларида” этник қирғиз, қозоқ ва уйғурларнинг ушлаб турилишига жаҳон ҳамжамиятининг эътиборини тортиш мақсадида Бишкекда бир неча марта пикетлар бўлиб ўтди.
Қирғизистон президенти Сооронбай Жээнбеков йил якунига бағишлаб ўтказган матбуот анжуманида Хитойдаги этник қирғизлар аҳволи тўғрисида берилган саволга жавоб берар экан, бу масалани ҳал қилишда Қирғизистон эҳтиёткорлик билан ёндашиши лозимлигини таъкидлаб ўтди.
