Макрон: Трамп француз сиёсатига Бурнини тиқмасин
Франция ҳукумати томонидан ёқилғи нархларининг оширилишига қарши 17 ноябрдан бери давом этиб келаётган “Сариқ нимчалилар” намойишлари тинмаяпти. Полиция билан намойишчилар тўқнашган ва тутун остида қолган пойтахт Париж майдонлари жанг майдонига ўхшаб бормоқда.
Намойишчилар “Бойлар яна ҳам бойиб кетмоқда, ўрта ва паст даромадли фуқаролар эса тоборо қашшоқлашиб бормоқда” деган шиорларни кўтариб чиқишмоқда.
Франция ҳукуматининг нархларни туширишига қарамай, намойишлар тўхтамаяпти. Улкан тартибсизликлардан қўрқиб кетган Франция ҳукумати чора кўриш учун армияни кўчаларга олиб чиқди. Франция Президенти Эммануэл Макроннинг истеъфосини талаб қилаётган намойишчилар «Биз нон ушоқларини эмас, ноннинг ўзини истаймиз», дея намойишларини давом эттиришини айтишмоқда.
АҚШ президенти Доналд Трамп Франциядаги норозилик намойишлари ҳақида ўз муносабатини билдирар экан, Франциядаги ҳолат Парижнинг “Иқлим шартномаси” иш бермаётганлигидан дарак бераётганлигини таъкидлади.
“Парижнинг Иқлим шартномаси Париж учун ишга яраётганини айтиш қийин. Франция бўйлаб норозилик нимойишлари ва исёнлар давом этмоқда. Одамлар атроф-муҳитни ҳимоя қилиши мумкин, дея учинчи дунё мамлакатларига катта миқдорда пул тўлашни хоҳламайдилар. Улар “Биз Трампни хоҳлаймиз!” дея чиқишмоқда. Мен Францияни яхши кўраман”, дея баёнот берди Трамп Твиттер саҳифаси орқали.
Шунингдек, Трамп ўз баёнотига, сўнгги ойларда кун тартибига келган Европа Иттифоқининг қўшма армияини ташкил этиш масаласини ҳам қўшимча қилди. АҚШдан мустақил “Европа Иттифоқининг қўшма армияини ташкил этиш” фикри Франсиядан чиққан ва биринчи бўлиб Германия тарафидан қўллаб қувватланган эди.
“Европа қўшинини ташкил қилиш ғояси биринчи ва Иккинчи жаҳон урушларида ҳеч яхши натижа бермади. Аммо АҚШ сизни қўллаб-қувватлади ва доимо қўллаб-қувватлайди. Бизнинг сиздан фақат бирдан-бир истагимиз ўз зиммангизга тушганини НАТОга тўлаб қўйишингиздир. Европани ҳимоя қилиш учун АҚШ миллий даромаднинг 4,3 фоизини тўлайди. Германия эса, бюджетининг атиги 1 фоизини тўлайди. Адолат шуми?!” дея твит қолдирди Трамп.
АҚШ президенти Доналд Трампнинг баёнотига Франция ҳукумати дарҳол жавоб қайтарди. «Трамп француз сиёсатига Бурнини тиқмасин!” дейилади Париж маъмурияти томонидан берилган жавоб баёнотида.
