Тошкент конференцияси иштирокчилари қўшма декларация қабул қилди
Тошкентда бўлиб ўтган “Тинчлик жараёни, хавфсизлик соҳасида ҳамкорлик ва минтақавий шериклик” мавзуидаги Афғонистон бўйича Тошкент халқаро конференциясида қатнашган халқаро гуруҳлар ва 20 дан ошиқ давлат расмийлари қўшма декларация қабул қилди.
Конференция якунлари бўйича матбуот анжумани ўтказган Ўзбекистон ва Афғонистон ташқи ишлар вазирлари¸ Тошкент декларацияси амалга ошган тақдирда¸ Афғонистонда кўпдан кутилган тинчлик ўрнатилишига хизмат қилишини билдирди.
“Бу ерда гап¸ биринчи навбатда¸ Афғонистон марказий ҳукуматининг Толибон ҳаракати вакиллари билан кенг кўламли тинчликка эришиш учун олдиндан шарт қўймасдан бевосита музокаралар бошлаш таклифини қўллаш ҳақида бормоқда”¸ – деди Абдулазиз Комилов.
Комиловнинг айтишича¸Тошкент декларацияси Кобул тинчлик жараëнини Афғонистонда тинчлик ўрнатишга қаратилган бошқа халқаро ва минтақавий ташаббуслар қатори¸ бу йўналишдаги бош форум ва восита сифатида эътироф қилади.
Декларацияда шунингдек¸ Афғонистондаги террорчилик ва наркотиклар контрабандасини тугатиш борасида амалий халқаро ва минтақавий ҳамкорликнинг аҳамияти алоҳида таъкидланган.
Комиловнинг сўзларига кўра¸ декларацияда Афғонистондаги хавфсизликни кучайтиришга қаратилган ҳар қандай ташаббуснинг мазкур давлат ҳукуматига тақдим этилиши ва бу жараëнда Толибон ҳамда “Ислом давлати” гуруҳларига бирор ëрдам кўрсатишнинг истисно қилиниши лозимлиги қайд этилган.
