Путин АҚШнинг 755 дипломатини Россиядан чиқариб юборишга қарор қилди
Россия Президенти Владимир Путин Россиядаги АҚШ дипломатларининг сонини камайтиришга қарор қилди. Россиянинг 24-телевизион каналига интервю берган Путин АҚШ ваколатхонасида фаолият юритаётган 755 нафар АҚШ дипломатидан ўз фаолиятини тўхтатиш ва мамлакатни тарк қилишни талаб қилди.
“АҚШнинг Россиядаги дипломатлари сони 755 кишига қисқартирилмоқда. Мана шунда Россиянинг АҚШдаги дипломатлари сони билан бир хил бўлади. Яъни ҳар икки тарафда ҳам 455 киши бўлади”, “Бошқа чора-тадбирлар ёки дипломатик муассасаларнинг ишлари бўйича бу рақамнинг кам ёки кўплигига келсак, бу кўрсаткич анча ортиқчадир. Чунки мингдан ортиқ дипломатлар ва техник ходимлар ҳозирда Россияда иш юритмоқда. Булардан 755таси ўз фаолиятини тўхтатишга мажбур. Чунки бу жуда кўпдир”, деди “Вести.ру”га интервю берган Путин.
Шунингдек Россия раҳбари ўз баёнотида “(Россия-АҚШ муносабатларида) вазиятнинг ўзгаришига умидимиз бор эди. Биз узоқ вақт давомида бир неча нарсаларнинг яхшиланишини кутдик. Бироқ кўриниб турибдики, яқин ўртада бирор бир ўзгариш бўлмайди. Ҳеч нарсани жавобсиз қолдирмаслигимизни кўрсатиб қўйишнинг вақти келди”, дея қўшимча қилди.
Путиннинг бу ҳаракати Вашингтоннинг Россияга қарши янги жазо чоралари учун жавоб сифатида баҳоланмоқда. АҚШ Сенати ўтган жума куни Россияга қарши санкциялар қўллаш қарорини тасдиқлаган ва қарор амалга ошрилишини эълон қилган эди.
АҚШ маъмурияти Путиннинг мазкур қарорини танқид қилди. АҚШ Давлат департаментининг вакили Путиннинг қарорини “асоссиз ва қайғули қадам”, дея атаб, Вошингтон бундай қисқартиришлар оқибатлари ва бундан кейинги ташланадиган қадамларга ўз муносабатини билдиришини таъкидлади.
Туркистон:
Россия (Путин), “айнан АҚШ рози бўлармикин, Ғарбнинг Рус режимига қарши қўйган санкцияларидан Москвани қутқариб қолармикин, умуман олганда режимни сақлаб қолармикин”, деб умид қилган эди. Лекин ундай бўлмади.
Натижада Путин Россияни иқтисодий, сиёсий, сақофий ва ҳарбий томонлама жар ёқасига олиб келиб қўйди. Россиянинг АҚШ розилиги учун Сурияда олиб борган қирғинбарот уруши Москва билан исломий олам ўртасида ички ва ташқи жиҳатдан ўта кескин ҳолатни пайдо қилди. Режим вакиллари бўлган алигархларнинг очкўз сиёсатлари эса, Россияни иқтисодий бўҳрон ҳолатига олиб келди. Халқаро сиёсат оламида, Россия деярли етакчи давлатлар сафидан тушиб, аграр яъни хом ашё сотиб тирикчилик қилувчи учинчи давлатлар қаторига тушиб боряпти.
Ғарб системаси Россияни тўла мустамлака қилиш учун ҳаракат бошлади. Навалний бош бўлиб олиб бораётган режимга қарши норозилик фикрий йўналиши Ғарб томонидан қўлловга олинган. Кейинги йилги сайловга қадар иш шу кетувда давом этса, Путиннинг мағлубияти тайин. Шунинг учун Путин ҳозирдан Ғарбнинг сақофий ва молиявий дастаклов механизмидан мамлакатини тозалаш ишини бошламоқчи. Чунки Америка дипломатлари, матбуот хизматчилари ва инсон ҳуқуқ ҳимоячиларининг катта қисми МРБ (ЦРУ) хизматчилари ёки уларга тобе бўлган иш юрутувчилардир. Лекин бу ҳаракати ҳам Путиннинг режимини сақлаб қолиши амри маҳолдир!
