ГЭС қуриши кутилган Чехия компанияси гумон остида қолди
Саноат, энергетика ва табиий бойликлардан фойдаланиш Давлат қўмитаси раиси Дуйшенбек Зилалиев ОАВда пайдо бўлган хабарларга изоҳ берди. Маълумки, ОАВда Қирғизистонда ГЭС қуришни режалаштирган Чехиянинг Liglass Trading CZ компанияси фаолиятига гумонлар пайдо бўлган эди.
Зилалиевнинг айтишича, қонунларга биноан танлов ва тендер талаблари илгари сурилган. “Бу компания бизнинг талабларга кўра кафолат сифатида 1 миллион 200 минг доллар миқдорида бадал тўлади”, -деди қўмита раиси.
Давлат қўмитаси раҳбарининг айтишича, улар барча битимларни тақдим қилишга тайёрликларини билдиришган, яширадиган ҳеч нарса йўқ.
“Компания 30 банк иши куни мабойнида бизнинг Россия олдидаги 37 миллион долларлик қарзимизни узмоқчи. Биз бир тийин ҳам сарфламаймиз. Агар улар ўз зиммаларига олган мажбуриятни бажармайдиган бўлса, биз 30 банк иш кунидан сўнг Битимни бир томонлама бузамиз ва иккинчи тендерни эълон қиламиз. Ҳеч қандай зарар бўлмайди”, -деди ва 30 банк иш куни таҳминан 50 календар куни эканини эслатиб ўтди.
Бундан аввал ОАВда Қирғизистон Ташқи ишлар вазирлиги мактубининг нусхаси эълон қилинган эди. Унда вазирлик Миллий энергия холдинг ва Иқтисод вазирлигига мурожаат қилиб, Чехиянинг Liglass Trading CZ компанияси билан ҳамкорликни давом эттирмаслик тавсия қилинади.
10 июл куни Қирғизистон ҳукумати ва Чехиянинг Liglass Trading CZ компанияси билан Юқори Норин каскадида иккита ГЭС ва 10 та кичик ГЭС қуриш тўғрисида Келишув имзоланган эди. Қирғизистон хукумати номидан ҳужжатга ҚР саноат, энергетика ва табиий бойликлардан фойдаланиш Давлат қўмитаси раиси Дуйшенбек Зилалиев, Чехия томонидан эса Liglass Trading CZ компанияси директори Михаель Смелик имзо чеккан.
