«Мустаҳкам асослар» Шом аҳли берган қурбонларга нисбатан беписандликдир

499
0

Риёз конференцияси иштирокчилари қабул қилган «Мустаҳкам асослар»: қўзғолоннинг мустаҳкам асосларига ҳамда Шом аҳли берган қурбонларга нисбатан беписандликдир

Америка ўзининг барча восита ва услублари ёрдамида Сурияда юргизаётган сиёсатни кузатаётган киши шубҳасиз қуйидагиларга гувоҳ бўлади:

Америка минтақадаги кўплаб малайларини фош этишга мажбур бўлди. Чунки муборак Шом қўзғолони унинг сиёсий ечимига қарши чиқди. Натижада Америка ўзининг мақсад ва режалари ҳақида очиқ айтишга мажбур бўлиб, Сурия келажагини демократик илмоний режимда кўраётганини билдирди. Бунга эса Шом аҳли ва у ердаги исломий қўзғолоннинг Пайғамбарлик минҳожи асосидаги рошид Халифалик сари кетаётгани сабаб бўлди. Масалан, Америка ташқи ишлар вазири Жон Керрининг 2015 йил 22 октябрдаги баёноти янгради. Унинг бу баёноти минтақадаги Туркия ва Саудия каби малайлари, Россия каби иттифоқчилари томонидан қўллаб-қувватланди. Керри ўз баёнотида халқаро тўртлик давлатлари Суриянинг бутунлигига, у ердаги кўппартиявий демократик илмоний тизимни сақлаб қолишга ҳамда «Суриядаги тинчлик ечимига қарши чиққан гуруҳларга қарши курашни» кучайтиришга келишиб олганини таъкидлади. Кейин Вена конференцияси бўлиб ўтди. Унда Американинг сиёсий ечими учун йўл харитаси ишлаб чиқилди. Яъни, иштирокчилар Сурияда келаси олти ой ичида ўтиш даври ҳукуматини тузишга, ўн саккиз ой мобайнида БМТ назорати остида сайловлар ўтказишга келишиб олишди.

Вена конференцияси иштирокчилари Суриядаги мухолафат жамоалари билан дарҳол музокаралар бошлашга ва улар билан жинояткор режим ўртасида илк учрашув ўтказишга қаратилган ҳаракатларни олиб боришга қарор қилишди. Саудия режими ижро этишга шошилаётган иш мана шудир. Яъни 2015 йил 9-10 декабрда Риёз конференцияси бўлиб ўтди ва унда гуруҳлар, ташкилотлар ва якка шахслар қатнашди. Мана, биз уларнинг якуний баёнотларига гувоҳ бўлиб турибмиз. Улар ўзларининг бу баёнотларида қабул қилган «мустаҳкам асосларини», мақсадларини ва буларнинг энг асосийси Суриядаги давлат фуқароликка асосланган давлат бўлишини ифодалашди. Бошқача ибора билан айтганда, шунча оқизилган қонлар ва берилган қурбонлардан кейин Шом заминида мусулмонлар устидан ҳукм юритадиган режим Исломни ҳаётдан ажратадиган демократик илмоний режим бўлишини ҳамда – баёнотда айтилганидек – терроризмнинг ҳар қандай шаклига қарши курашишларини билдиришди. Бу эса улар куни кеча биргаликда, елкама-елка жанг қилган бошқа гуруҳларга қарши Асад режими билан битта хандақда туриб жанг қилишларини ва бу гуруҳлар терроризм рўйхатига киритилишини англатади. Маълумки, Иордания режими 2015 йил 18 декабрда ўтказилиши белгиланган Хавфсизлик Кенгаши йиғинига тақдим этиш учун террористик гуруҳлар рўйхатини тайёрлаш билан шуғулланаётган эди. Конференция қатнашчилари Суриядаги мавжуд ажнабий жангчиларнинг ҳаммасига, яъни Шом аҳлига нусрат-ёрдам бериш ва у ердаги заифалар номусини ҳимоя қилиш учун кирган гуруҳларга қарши эканликларини таъкидлашди. Шунингдек, аёллар, гўдаклар ва қариялар қотилининг вакиллари билан музокараларга киришишга тайёр эканларини ҳам билдиришди. Бунга 2012 йил 30 июндаги Женева баёнотига ҳамда шу музокараларни йўналтирувчи халқаро қарорларга асосланган ҳолда тўхталишди. Ҳолбуки, бу музокара қарорларида Шом аҳли учун ҳеч қандай рол берилмаган, аксинча, у БМТ раҳнамолиги ва кафолати билан ҳаммага мажбуран тиқиштирилгандир. Ҳа, Риёз йиғини қатнашчилари БМТ ва халқаро ҳамжамиятнинг ўт очишни тўхтатишни назорат қилишдаги ролига розиликларини ва уни қўллаб-қувватлашларини билдиришди… Улар қабул қилган «мустаҳкам асослар»дан айримлари мана шулардир. Бир назар солган киши бу «мустаҳкам асослар» Ғарб давлатлари, асосан, Америка истакларига батамом уйғун келганига, балки Америка хоҳлаётган нарсанинг айнан ўзи эканига гувоҳ бўлади. Америка ўзининг иттифоқчи ва малайлари билан давлатнинг фуқароликка асосланишига қарор қилган. Тинчлик ечимига рози бўлмаган, ўзи уларни террористик ташкилотлар дея атайдиган ҳамда йиғин иштирокчилари ҳали терроризм рўйхатига киритиладиган гуруҳлар қайси гуруҳлар экани маълум бўлмай туриб, шоша-пиша рад этган гуруҳларга қарши курашишга ҳам Америка қарор қилади. Ҳа, ўтиш даври ҳукуматини тузиш, конституция ишлаб чиқиш ва сайловлар ўтказиш, буларнинг барчаси Америка розилиги билан ва БМТ ниқоби остида ўтказилади. У энг ёмон билан ундан ҳам ёмон ўртасини танлаш ихтиёрини берадиган демократик ўйинларда иштирок этишга мажбурлайди. Шундай қилиб, Риёз конференцияси қатнашчилари ўз ишларидан бирортасини мустақил равишда ҳал қилолмасликларини кўриб турибмиз. Зеро, улар конференцияга ўзларидан талаб қилинган нарсаларни бажариш учун терроризм баҳонасида боришди. Бунда улар шаҳидлар қонини ҳам содир этилган шунча очлик, қирғин, қувғин ва қамаллар… натижасидаги қурбонларни ҳам эътиборга олишмади. Бу эса ифлос сиёсий маблағнинг ҳамда кофир Ғарб этагига осилишнинг маҳсулидир. Шунингдек, бирров назар солган киши бу «мустаҳкам асослар» Аллоҳ Субҳанаҳу ва Таолонинг шариатига хилоф эканига ҳам гувоҳ бўлади. Зеро, уларнинг бу мустаҳкам асослари динни ҳаётдан ажратиш эътиқодига ҳамда шу эътиқоддан балқиб чиққан ғайриилоҳий тузумларга асосланган бўлиб, мана шу жиҳатдан ҳам ношаръийдир. Шунингдек, унда банданинг ҳукми Аллоҳнинг ҳукмидан афзал кўрилган. Аллоҳ Субҳанаҳу ва Таоло айтади:

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللَّهِ حُكْمًا لِقَوْمٍ يُوقِنُونَ﴾

«Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!»                                                                 [Моида 50]

Аллоҳ Субҳанаҳу ва Таоло бизга инсон нафс-ҳавосига бўйсунмайдиган мустаҳкам асосларни тузиб берган. Улар ла илаҳа иллаллоҳу Муҳаммадур Росулуллоҳ ақидасидан балқиб чиққан шаръий аҳкомлардир. Уларнинг энг биринчи ва асосийси, Пайғамбарлик минҳожи асосидаги рошид Халифаликни тиклаш орқали Аллоҳ нозил қилган ҳукм билан бошқаришдир. Зеро, бу бошқарувни Шом аҳли талаб қилиб, унинг йўлида шаҳидларни бермоқда. Аллоҳ Таоло айтади:

إِنِ الْحُكْمُ إِلَّا لِلَّهِ أَمَرَ أَلَّا تَعْبُدُوا إِلَّا إِيَّاهُ ذَلِكَ الدِّينُ الْقَيِّمُ وَلَكِنَّ أَكْثَرَ النَّاسِ لَا يَعْلَمُونَ

«Ҳукм-ҳокимлик фақат Аллоҳникидир. У зот сизларни фақат Ўзигагина ибодат қилишга буюргандир. Энг тўғри дин мана шудир. Лекин одамларнинг кўплари буни билмайдилар» [Юсуф 40]

Бу аҳкомларнинг иккинчиси, кофир давлатларидан қутулиш, уларнинг нуфузларига барҳам беришдир. Зеро, Аллоҳ Субҳанаҳу ва Таолонинг

وَلَنْ يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلًا

«Ва Аллоҳ ҳаргиз кофирлар учун мўминлар устига йўл бермагай»     [Нисо 141]

деган буйруғи шунга далолат қилади. Учинчиси, режимни барча аркону башаралари билан ағдаришдир. Росулуллоҳ A бундай деганлар:

«سَتَكُونُ أُمَرَاءُ فَتَعْرِفُونَ وَتُنْكِرُونَ فَمَنْ عَرَفَ بَرِئَ وَمَنْ أَنْكَرَ سَلِمَ وَلَكِنْ مَنْ رَضِيَ وَتَابَعَ»

«Келажакда амирлар бўлади, сизлар (уларнинг маъруф ва мункар амалларини жуда яхши) биласизлар ва (мункарларини) инкор этасизлар. Бас, ким (уларнинг мункар амалларини) билиб, (ёмон кўрса) пок бўлади, ким (уларнинг мункар амалларини) инкор қилса саломат қолади, лекин кимда ким (мункарга) рози бўлиб, эргашса борми!». (Имом Муслим ривояти). Демак, кўриб турибмизки, муборак Шом қўзғолонининг мустаҳкам асослари Аллоҳ Субҳанаҳу ва Таоло барча мусулмонлар зиммасига юклаган шаръий аҳкомлардир. Бу қарорлар ўзгармайди ва Ғарб истакларига буйсунмайди. Шу боис Аллоҳ Субҳанаҳу ва Таолонинг нусратини истаган ҳар бир киши Унинг аҳкомига риоя қилмоғи ва Ислом Умматига қарши тўқилаётган фитнада иштирок этишдан тийилмоғи ҳамда Ислом душманларининг муборак қўзғолонни бўғизлаш ва унинг қурбонликларини беҳуда кетказиш мақсадида ишлатадиган қуролига айланиб қолмаслиги лозим. Биз уларни Аллоҳнинг ғазаби ва азобидан огоҳлантирамиз. Зотан, Шом заминидаги мусулмонлар шунча берган қурбонликлари ортидан энди фақат битта нарсага рози бўладилар, у ҳам бўлса, қўзғолонлари Ғарб рози бўладиган нарса билан эмас, Аллоҳ рози бўладиган нарса билан якун топишидир. Шом замини мусулмонлари уларнинг фарзандлари қонларини малайлик ва хоинлик бозорида сотмоқчи бўлаётган кимсаларни рад этмоқлари даркор. Зеро, шаҳидларимиз қони ва аҳлимиз қурбонлиги сотиб юбориш учун берилмаган. Золим кимсалар эса яқинда қандай оқибат сари кетаётганларини билиб олурлар.

 

Аҳмад Абдулваҳҳоб

Ҳизб ут-Таҳрир-Сурия вилояти матбуот бўлимининг раиси

LEAVE A REPLY

Please enter your comment!
Please enter your name here