Туркия президенти Ражаб Тоййиб Эрдоган Саудия Арабистони қироли Салмон бин Абдулазиз билан Саудия пойтахти Риёддаги қирол саройида учрашув ўтказди. Туркия президентлигига қарашли манбадан олинган маълумотга кўра, учрашувда сиёсий, иқтисодий ва хавфсизлик каби масалаларда икки давлат ўртасидаги ҳамкорликни кучайтириш режалари кўриб чиқилган.
Саудия қироли Салмон меҳмонлар шарафига берган зиёфатидан сўнг ташкил қилинган хайъатлар учрашувида икки давлат ўртасидаги алоқалар муҳокама қилинди. Шунингдек, Сурия, Ироқ, Яман, Фаластин ва Мисрни ўз ичига олган минтақавий мавзулар устида ҳам баҳс мунозаралар бўлиб ўтди.
Ҳар икки тараф ҳам мазҳабий ёндошув минтақага салбий таъсир кўрсатаётганига эътибор қаратар экан, Сурия мухолифатига бериладиган дастак кучайтирилиши лозимлигини таъкидлашди. Уларга кўра, Сурия мухолифатига бериладиган дастак натижани қўлга киритишга имкон берадиган даражада кучайтирилиши лозим.
30 дақиқа давом этган ҳайъатлар учрашувидан сўнг Қирол Салмон билан президент Эрдоган 35 дақиқа ёлғиз учрашув ўтказди.
Саудиянинг Макка газетаси икки раҳбар учрашуви ортидан Туркиянинг Миср билан алоқаларида ҳам ўзгариш юз бериши мумкинлигини олға сурди. Газетанинг ёзишича, Саудия ҳукумати тарафидан Миср, Туркия ва Саудия иштирокида дипломатик алоқаларни ривожлантиришни кўзда тутган учрашув ташкил қилиниши мумкин. Бироқ Туркия президенти Эрдоган Саудияга отланар экан, журналистларнинг Миср президенти билан учрашиши ҳақида берган саволига “Ҳазил қиляпсиз, ҳарҳолда”, деб жавоб берган эди.
