Россия президенти Владимир Путин тоборо ёмонлашиб бораётган давлат иқтисодини тиклаш учун қирққа яқин олигархлардан ёрдам сўради.
Путин устивор рус тадбиркорларини бир ерга тўплаб мамлакат юз тутган оғир иқтисодий вазият ҳақида маълумот берди. Путинга кўра, иқтисодни йўлга солиш учун Россиянинг ички ҳолатидан фойдаланиш лозим.
“Бир биримизга дастак бўлайлик. Россияда иқтисодий жараённи изга солиш ва нефт қарамлигига чек қўйиш учун фурсатдан фойдаланайлик”, “Олдимизда қийин вазифалар турипти. Ривожланиш даврининг оғир босқичидан ўтишга мажбур бўлишимиз мумкин. Буни муваффақиятли амалга ошира оладиган бўлсак, бундан охирги 15-20 йилдан буён олдимизда турган энг муҳим вазифани бажариш ва иқтисодни ҳар томонлама ривожлантириш учун фойдаланишимиз мумкин”, деди Путин қирққа яқин олигархлар тўпланган йиғинда.
Россия ҳукумати олигарҳларга эҳтиёж сезаётганига ишора қилган Путин “Барчамиз бир биримизга дастак бўлишимиз учун ва давлат иш билармонлар дунёсини ҳис қилиши учун бу ерда тўпландик”, деди.
Катта сармоядорлар, банк ва ширкат эгалари иштирок этган йиғилишда машҳур олигарх Роман Абромович, Алфа банкининг раҳбари Пётр Авен, Лукойл нефт компаниясининг бошлиғи Вагит Алекперов, шунингдек Виктор Вексельберг, Олег Дерипаска, Сулейман Керимов, Александр Мамут, Владимир Потанин, Михаил Прохоров, Геннадий Тимченко каби миллиардерлар ўрин олди. Ораларида уй қамоғига ҳукм қилинган ва қисқа муддатга озод қилинган Владимир Евтушенков ҳам борлиги диққатни тортди.
Йиғилишда Кремлнинг идорий ишлар раҳбари Сергей Иванов, бош вазир ёрдамчиси Игор Шувалов, Путиннинг маслаҳатчиси Андрей Белоусов ва Россия марказий банкининг раҳбари Елвира Набиллуна ҳам иштирок этди. Бош вазир ёрдамчиси Игор Шувалов йиғилишда иштирок этаётган тадбиркорлардан ярми ўзининг дўсти эканлигини ва улар Путиннинг таклифини ижобий қабул қилишига ишонишини билдирди.
Йиғилишда Путин олигархларга Россия қийин кунларни енгиб ўтиши учун хориждаги пулларининг бир қисмини мамлакатга қайтариб, бир фонд ташкил қилиш сиёсатини таклиф қилганлиги айтилмоқда.
